Startseite
Use Plattdüütske Dag startet an 18. Juni 2023
anne Woatermöhlen in Döhren
Noch mehr Informationen gifft et ünner Aktuelles un ünner Termine.
Juni
In'n Juni geiht dat gaut vörran.
De Spargel kriggt dat Scheiten.
Wi koakt uns jung' Kartuffefn af,
Diät is nu vergerten.
Wi fraht us up dat friske Greun,
up Arvgen, Bohnen, Worteln
un rode Erdbeern up de Tort
un ok ut groote Schoalen.
De Käfers brummet hen un her
un seukt sik wat to nasken.
De Hamsters finnt wat up'n Feld,
packt alles in öhre Tasken.
De Natur moaket nu Oawerstünn',
dat wasset an alle Kanten.
Wi hebbt in'n Goaren fix to daun
un heeget use Blaum' un Planten.
Originoal von Brigitte Fokuhl, oawersettet up hiesiget Platt von M. Graefen
Plattdüütsken Dag in Lindhorst/Schaumburg
De Schaumburger könnnen nu endlich öhren
mehrmoals verschoabenen Dag fiern.
Use Verein was mit en Bäukerdisk beteiligt.
Mehr Infos doartau ünner Aktuelles!
--------------------------------------------------
Plattdüütsk inne Schaule Lahde-Frille
Use Vörstandsmitglied Hanna Dörmann-Flitner
is mit Plattdüütsk-AGs inne Schaule Frille un Loahe mit grooten Erfolg aktiv.
Bi de Inweihung det Anbaus in Frille hett sei
tolle Plattdüütske Inloagen vöreföhrt:
Sketch mit Voader un Jungen un einen RAP mit alle Hannewarkslüe,
de bi dän Bau mithulpen hebbt.
Woaterschloss Ovelgönne
Eine Wierke lang regierde hier Plattdüütsk,
Plattdüütsk inne Kerken un de Plattdüütske Klönkreis fierden Jubiläum.
Noch mehr doarvon ünner AKTUELLES!
_________________________________
Use neie Joahrbauk is fertig taun Verkoop!
Dat neie Joahrbauk 2022 weerd verkofft
in veele Geschäftstehen von de VB Herford-Mindener Land,
bi de Gemeinde Stemwede direkt un ok
bi dän Online-Shop von de Gemeinde Stemwede,
to finnen ünner
https://www.stemwede-shop.de/p/plattdeutsches-jahrbuch-2022
ok bi de Baukhandlung Betz in Petershoagen,
bi de Stadtverwaltung Petershoagen,
bi de Vörstandsmitglieder,
bi dän Kreis Minnen-Lübbecke, Amt 80
So süht et ut, dat neie Joahrbauk 2022,
weer mit veele Plattdüütske Geschichten un Begierbenheiten
ut alle 11 Kommunen det Kreises Minnen-Lübbecke.
Ok Biedräge oawer Platt in Schaulen un Kinnergoarns sind dorbie,
äbenso ok Sieten von de AG Plattdüütsk-inne-Kerken.
Ein grootet Dankeschön an alle,
de us Biedräge schicket hebbt!
-------------------
So seihet use Joahrbäuker ut, de wi betlang rutegerben hebbt.
Doartau kann man jümmer dat passende Bild
von de jeweilige Pressekonferenz seihne,
bi de dat Bauk vörestellt wurn is.
Bi jede Utgoabe eines Baukes hett us de VB
- damoals noch Mindener Land -
sowohl bi dän Druck als ok bi´n Verkoop
düchtig ünnerstützet.
In Gegenzug läset Plattdüütske bi de VB Mindener Land.
Drei Plattdüütske ut usen Verein hebbt bi de Jubiläumsveranstaltungen vonne VB
Dönekens un Geschichten taun Frahen un Amüsieren vörläsen.
In Hille hett Helmut Möller,
in Minnen Wilma Stahlhut un in
Gorpen-Vahlsen Magrit Graefen vöredroagen.
Noch mehr Biller stoaht inne Fotogalerie!
Use Verein hett enge Kontakte tau de VHS Herford.
Jüst gaff et ne Mail mit en intressanten Gedicht
taun Themoa CORONA:
MUTATION
De Minsch, meent wi, weer Gott sien Kind,
so gifft de Bibel dat to lesen: Ut backsig Lehm un Geist sien Wind
ward Gottes-Bild un Eerdenwesen. De Tieden bröchen Twiefel mit,
wi seht uns hüüt mit anner Ogen, de Wetenschaft ehr Forscher-Schritt,
de stell nu mal ganz anner Fragen: Is düsse Minsch de Schöpfungs-Kroon?
Un kümmt Adam ut Gott sien Hannen? He is een Apen-Mutation:
De Tofall bröch Adam tostannen. Man Adam seggt:
So oder so, ik laat mi dat doch nich bestrieden:
Wat ik hier meen un seggen do, dat is un blifft för alle Tieden.
Ik herrsch hier över Deert un Plant, ik ganz alleen kann Leven düden.
Wenn't sien schall, bün ik Glücks-Mutant, heff Recht, mien Macht hier uttowieden.
De Mutation hett Vördeel bröcht, dat liggt nu düüdlich op de Hannen:
Mi steiht dat to, dat Levensrecht, ik bün de Herr in alle Lannen!
Doch nu hebbt wi Corona-Tied, een Virus lehrt de Welt dat Bangen.
Een Virus, winzig un vun wied un harr bloots een Verlangen:
Ik will de Herrschaft! Ik, de Wicht, un ut Pandora ehren Kübel,
gah mit de Minschheit in't Gericht, ik bün de Held un speel den Düvel.
Adam, de Apen-Mutation is een Gefohr för't wiede Leven
mit all sien Gier un raffig Doon; nu kann he geern mal töven.
Wer hier muteert, dat bün nu ik, kann doch dat sülve Recht verlangen!
Un nu speel ik mal de Musik ganz gräsig schrill, de Welt to bangen.
De Minsch hett keen besünner Recht, dat mutt he endlich mal begriepen.
Un nu geiht jem dat ok mal slecht, de Minschen, düsse Grootmuul-Typen.
Nu wendt sik mal dat Herrschafts-Blatt,
un nu regeert de Lüe-Lütten un sett de Minschenwelt mal matt:
In'n Schiet laat ik de Spinner sitten. Dat geiht mi böös nu gegen'n Strich,
un dat kann so nich lange blieven:
Dat Virus mutt alsbald torüch,wi Minschen mööt de Pest verdrieven.
Jawoll, he kriggt Kritik to höörn, de Minsch, un bitt sik op de Lippen.
De Tied seggt em, he mutt noch lehrn; dat Leven knufft em in de Rippen.
He hett de Schöpfung nich verstahn, he hett ehr allto ruug behannelt,
un dorför kriggt he nu den Lohn, denn nu hebbt sik de Tieden wannelt.
Ik meen, de Minsch hett grötter Recht, man kann warraftig nich verglieken;
dat Virus hett em Lieden bröcht, dorüm mutt nu düss Virus wieken.
Denn, Minschenkinner, de köönt lehr'n, un dat ward sik in Tokunft wiesen,
se lehrt wohrschiens Natuur to ehr'n na all den barg Corona-Krisen.
Villicht, dat ok de Minsch muteert un wiest denn noch ganz anner Sieden.
Dat Virus hett sien'n Sinn bekehrt, un he geiht to op beter Tieden.
Man stell sik dat mal bildlich vör: De Aap muteert to Minschenwesen,
wenn nu de Minsch muteren wörr, dat kunn de Welt-Problemen lösen.
De Minsch muteert to Minschlickeit - dat is mien allergröttste Höpen
- to Recht un to Gerechtigkeit, hett Pandemie ehr Lex begrepen.
Dat Klima nimmt he sik to Hart, he weet, dor mutt sik wat bewegen.
He speelt nu een bedachter Part de Schöpfung un de Welt to Segen.
Respekt is nu dat wichtigst Woort, Respekt för all dat bunte Leven.
De Minsch – muteert to fründlich Aart - is nu veel dichter an den Heven.
Sien Aart is slichter un is sacht, söcht Utgliek un söcht Freden.
Na, Virus, denn man gode Nacht! Corona slöög de Welt in Keden,
de Pandemie, se hett uns engt un uns den frieen Aten nohmen.
Man eenmal ward de Keden sprengt, un statts den Doorn blöht dor de Blomen.
Un nu genoog mit di, hau af! Nu rut mit di ut Schlund un Näsen!
Söök di ganz wied vun hier dien Graff; wi Minschen denkt an di mit Gräsen.
Un dien Mutanten, lösch de ut, wi wüllt bald wedder singen.
Dien Dood, du feixen Höllen-Bruut, dien Afgang ward uns Freiden bringen.
Denn kümmt de Dankbarkeit to Klang un maakt dat Leven lichter,
un alle Welt is een Gesang. Ik segg, al hüüt weet dat de Dichter.
3. / 2021 Cord Denker
Pestor ut Schleswig Holstein